'Hamog'
Rey Jorca Supranes

Kumakapit, nananalig;
Umaasa, naghihintay;
Sa mga palad na magbubukas
Para sumalo at damhin
Ang tunay na hangarin
Upang hindi tuluyang bumagsak
Sa walang katuturang wakas.

Sa mga talampakan
Mayr’ong panalangin
Sana’y kumawala kasabay
Sa pagbukas ng liwayway.
Sa bawat hakbang;
Sa bawat paglapat;
Ito’y bapor na sasalba
At magbibigay pag-asa.

Sa pagsikat ng araw
Unti-unting natunaw
Ang hindi nakasayaw.

Umaasang bukas
Ay papalarin
Para sila’y angatin.