'BALAT'

Rey Jorca Supranes

Binabalot ng balat ang tao kaya malawak ang sinasakop nito sa ating katawan. Nagsisilbi itong panangga sa matinding temperatura - nakakasunog na init ng araw, sobrang nakakaginaw na lamig. Pinoproteksyunan din tayo ng ating balat sa mga posibleng impeksyon at matatapang na kemikal. Ang balat ay nagbibigay indikasyon para ating maramdaman ang mga nangyayari sa ating paligid. Tunay na malaki ang silbi ng balat sa katawan ng tao.

KULAY NG BALAT
Ang melanin ang nagbibigay kulay sa balat ng tao. Nagdedepende sa lokasyon ng bansa kung gaano kadaming melanin ang pino-prodyus ng katawan para pagbatayan sa kulay ng balat. Ito ang dahilan kung bakit nagkakaroon ng iba't-ibang kulay ang balat ng tao. Mayroong mapuputi, kayumanggi at maiitim. Maraming tao ang nakaranas at patuloy na dumadanas ng hirap at diskriminasyon dahil lang sa kulay ng balat nito. Kinaklasipika kasi ng tao ang balat sa primera klase, segunda mano at mababang-uri.

Ang balat na nagsisilbing proteksyon sa mga elemento na maaaring makasama sa tao ay siyang unang nagiging elemento para ikahiya, kamunghian at pandirihan ang pagkatao nito.

Sa katunayan wala namang kasalanan ang balat kundi ang mga hangarin at pagnanasa na bumabalot sa pagkatao.

Ito marahil ang dahilan kung bakit patuloy na sinusuportahan ang ideya na ang maputing balat ay ang superyor sa mundo. Ito rin marahil ang dahilan kung saan ang balat ay ginagawang negosyo. Ginagawan ng paraan para pagkakitaan at minamani-obra ng iilan para maging batayan ng kagandahan at kung ano ang katanggap-tanggap para sa lipunan. Kaputian at kakinisan ang nagiging batayan dahil ito ang imaheng kalimitang pinapakita sa iba't ibang uri ng media.

Hinihimok ang ating pag-iisip na kung gusto natin ng “primera klaseng” balat ay magagawan ng paraan. Nagmistulang puting “wrapper” lang ito na maaaring bilhin sa tindahan kung gusto mong balutin ng kagandahan at maging kahanga-hanga sa paningin ng iba. Hindi nakakapagtaka kung bakit ang daming ina-advertise na pampaputi, pampaganda at pampakinis ng balat. Nariyan rin ang mga beauty clinics na nagmimintina at nagpapanatili ng mga naghahangad magkaroon ng kutis-artista at mala-porselanang balat.

NIPIS AT KAPAL NG BALAT
Madalas ang balat ang indikasyon para matantya ang edad ng isang tao. Sumasabay ang balat sa mga kaganapan ng buhay. Habang bata pa ang isang tao, manipis ang balat sa mga elemento sa kaniyang paligid. Parang “BALAT-SIBUYAS” ito na sensitibo kaya dobleng ingat ang pag-aalaga dito.

Ang mga karanasan at pagsuong sa mga hindi pambihirang hamon ng buhay ay nagpapakapal sa dating manipis na balat ng tao. Madalas dahil sa kagustuhan ng tao na maging matagumpay at lamang sa iba ay KINAKAPALAN ang balat sa MUKHA para maging “BALAT-BAYAWAK.” Ang hiya na napapaloob sa katawan ay hindi na maarok dahil sa sobrang kapal na nito.

Kung ang pagkatao ay binalot na sa“balat-bayawak,” wala na itong kapasidad para damhin ang mga pangangailangan ng kapwa at magkaroon ng DELIKADEZA. Nagiging MAGASPANG ang balat pati na rin ang pag-uugali. Hindi na rin alintana ng tao na binabalatan nito ng buhay ang kapwa sa kaniyang mapanirang aksyon at salita.

PAGBABALAT SA BALAT
Minsan naisip ko ano kaya kung ang tao ay binalatan ng balat. Siguro ito na ang pagkakataon ng pagkakapantay-pantay ng lahat. Siguro ito na ang pagkakataon na makita ang tunay na hangarin ng kapwa. Siguro ito na ang pagkakataon na mabalatan ang mga nagba-BALAT-KAYO.

PANIBAGONG BALAT
Ang “balat-bayawak” na bumabalot sa pagkatao ay maaari pang numipis kung ang PUOT, GALIT at INGGIT ay hiludin na parang mga libag sa katawan. Pagkatapos ay sabunin at haplusin ito ng PAGMAMAHAL, KABAITAN at PAGTANGGAP SA PAGKAKAIBA NG LAHAT.

Sa pagkakataong ito ang dating SUGATAN at MAKALYONG balat na nagpapa-AGNAS sa pagkatao ay nagbibigay pagkakataon sa panibagong balat na umusbong para sa isang MASIGLA at MAY KATUTURANG BUHAY.